Deitingen auf der Suche nach Juniorentrainer/innen

Dr FC Deitige und vor auem üsi Juniore bruuche no dringend Ungerstützig für die kommendi Saison 2019/20. Mir sueche motivierti und cooli Trainer-/inne wo i üsere Junioreabteilig mithäufe. Churz: Mir sueche Di!

Ufgschtöuti Kids, e verantwortigsvoui Ufgab, dr wahrschinlech best Verein wit und breit und e top Infrastruktur erwarte Di!

Du meinsch dArbeit aus Junioretrainer isch aschpruchsvou? Jo, das ischsi! Nid ou chli asträngend? Doch, klar!

Aber he! Weisch was? es macht unheimlech vüu Spass!! dKids und die Jugendleche uf em Wäg zu de Aktive vo üsem FC Chäswiu zbegleite, witerzbringe und mitne Erfoug (und Niderlag) zfiire isch e unbezaubari Erfahrig! Für di und für dKids!

Apropos unbezaubar: natürlech machsch Du das nid gratis! Riich wirsch zwar nid dermit, aber wär wott das scho?!

Uf üsi Ungerstützig chasch natürlech jederzit zöue! Mir würde dir ou e Usbüudig zum J&S-Trainer ermögleche.

Do drbi isch dr KIFU Kurs dr erscht Schritt zum Trainerdiplom. Mitemne Trainerdiplom chasch spöter ou e Mannschaft bi de öutere Juniore oder ou bi de Aktive trainiere.

Nomou churz: mitem Istig us Trainer i üsere Junioreabteilig leisch auso der Grundstei für dini erfougriichi Karriere us Startrainer!

Füeuschdi agsproche? Hesch Interesse mitzhäufe? Oder könnsch öpper? Oder öpper wo öpper könnt? Oder chaschders mit öpperem zäme us Trainerduo vorstöue?

Faus eini vo dene Froge mit jo chasch beantworte oder besser: faus dAntwort nid uf aui die Froge nei isch: mäud di bi mir (079 772 14 42 oder Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!).